GASYKAMANJA.COM

Vakivaky tany paiky maregniny,

Kôlakôla bongo, hatiala tivégny,

Ataova fo fa anao mbala hanegniny,

Menimeny tsy mahakaiky mahaleny.



Izikoa anao tsy mahay, ‘ty mba tandignesa,

Fa jaly ndreky anao zaho tsy nahefa,

Anao magnanognano, olo jiaby sahiragna,

Zanaka aman-jafy mandry mandriragna.



Kakazo aby io mampisy mahaleny,

Mbala irô koa mampahavy tsikotsiko,

Tsiko madio andisinao mihegny,

Anao manintsinitsy, vaky fipiko.



Biby maro karazany agnaty ala agny,

Koa tsy nagnino anao k’aza kotragniny,

Maro rô tsy nahita mbala ti-hizaha,

Tsy gasy karaha anao io, tsy vazaha.



Tegnandrano k’aza asiagna maloto,

Tsy ambevy, tsy amporihagna, io fo giahin’olo,

Tsô mampanihitry raha tsy fitognonigny,

Mampivarahontsagna fiarahamonigny.



Setroko io mandreraka hegny,

Ozone koa tsisy atsika kirengo,

Moramora fa zahay mba ti-hihegny,

Anao mongoa, fa tsô fa ti-hengo.



Tany tsy irigny,

Biby tarimigny,

Hatiala kobabigny,

Rano tsy vidigny.



Ologno mihegny,

Biby tsy vonegny,

Kakazo tsy tivegny,

Hatiala mahaleny.



Moramora anao, moramora anao…



Babaïque